Arroyo suportado

Naval, Biliran -Gipakita sa mga opisyal ning lungsod lakip na sa probinsya ingon man sa nagkalainlaing sektor nga padayon nila nga gipaluyohan si Presidente Gloria Macapagal- Arroyo.

Si Gobernador Rogelio J. Espina maoy nangulo sa mga opisyal ning probinsya sa ilang pagpalanog sa suporta sa liderato ni Presidente Arroyo sa nasud.

Nanawagan si Gobernador Espina sa katawhan nga ipadayon gayud nila ang pagpaluyo sa administrasyon ni Arroyo gumikan kay nakita man nila nga kaayohan sa nasud mao man ang gitan-aw niini.

Nakita nila nga dili angayan nga paminawon ang nanawagan nga siya angayan na nga muluwat sa katungdanan.

Gawas sa mga opisyal ning probinsya mipadayag usab sa ilang padayon nga pagpaluyo sa administrasyon ni Presidente Arroyo ang mga opisyal sa probinsya sa Leyte ingon man sa Eastern Samar.

Si Presidente Arroyo nga miduaw sa probinsya sa Eastern Samar sa miaging buwan mipasalig nga ang iyang administrasyon muhimo gayud og dinalian nga lakang aron sa pagpalambo sa ekonomikanhon nga kalambuan sa probinsya.