Ika-70 ug 71 gitumba sa vigilante

Laing duha ka mga gidudahang dunay mga rekord sa kapolisan gitumba sa gikahadlukang vigilante niadtong milabayng adlaw gikan sa managlahing dapit ug takna dinhi sa dakbayan samtang laing usa ka tawo napagan atol sa insidente.

Ang ika-70 nga gituohang biktima sa vigilante mao si Jimmy Candar, 27, ulitawo, dispatser ug giingong nabilanggo kaniadto tungod sa pagpamaligya og drogas asoy pa sa iyang 80 anyos nga apuhan nga si Vicenta Rabago.

Ang gitumbok nga mamumuno sa biktima mao ang duha ka wala ilhing mga lalaking nag-helmet luwan sa usa ka motorsiklong pula alas 3 pasado sa hapon.

Bisan sa kabaga sa mga tawong naglakaw diha sa dalan P.Lopez Barangay Kalubihan walay kukahadlok ang mga vigilante sa pagpusil patay kang Candar kinsa naglingkod diha sa daplin sa dalan ginamit ang kalibre 45 nga armas de fuego base usab sa nakuhang tulo ka basiyo sa bala ug usa ka slug sa maong kalibre diha sa crime scene.

Si Candar daling gidala sa mga mirespondeng sakop sa Mobile Patrol Group nga sila si PO3 Reynaldo Tagalog ug PO1 Ben Navales sa Cebu City Medical Center apan gumikan sa grabeng igo niini sa walang mata nga milapos sa luyo sa ulo ug laing igo usab sa walang bahin sa dughan ug liog patay na kining nadangat sa tambalanan.

Samtang sa laing bahin usa ka Amadeo Austeniane ,32, bugaw ang gitipi usab diha sa dalan Don Pedro Cui eskina P.del Rosario Barangay Camagayan ning dakbayan ang gipusil patay sa duha usab ka wala mailhing mga lalaking luwan sa usa ka motorsiklo ug pulos nag-helmet.

Asoy pa ni SPO3 Zenaido Pastorfide sa Homicide Section sa Banat News ang biktima kasamtangang nagbarog sa daplin uban sa laing mga bugaw dihang kalit nga miabot ang mga suspek dayong pusil kaniya makadaghang higayon.

Ning tungora dunay usa ka gwardiya nga nagkaon sa tindahan ang naamong ug giilang si Roger Uy,51, molupyo sa Sitio Cabatingan sa samang barangay, si Uy nadangat sa CCMC gumikan sa igo diha sa iyang tiyan.

Sumala pa ni Pastorfide posibleng may kalambigitan sa drogas ang hinungdan sa pagpatay o dili ba kaha sa kustomer nga nasuko gumikan sa pagkatikasan sa biktima.

Sigun pa ni Pastorfide sa ilang nakuhang impormasyon sa mga silingan sa biktima daghan ang mireklamo batok kang Austiniane gumikan kay ilisan niini og laing babaye ang napilian sa mga kustomer.

"Daghan na lagi kuno nasuko ana niya kay mo-switching lagi kuno og babaye, dili ang babayeng napilian maoy iyang pasakyon sa sakyanan sa mga kustomer," asoy pa ni Pastorfide.

Si Austiniane nakaangkon og duha ka samad pinusilan sa likod, usa sa ulo ug usa sa bukton hinungdan sa iyang kamatayon samtang nakuha sa crime scene ang unom ka basiyo sa kalibre 45