Mipalapad sa ilang kampanya

Miabag karon ang kadagkuan sa Naval Forces Central nga nagbase sa dakbayan sa Lapu-Lapu sa kampanya batok sa suliran sa illegal nga pangisda nga nanghitabo karon sa nagkalain-laing probinsya sa Kabisay-an.

Si Commodore Ludovico Franco, bag-ong milingkod nga hepe sa Naval Forces Central mibutyag niini human niya makita nga kinahanglan gayud palapdan ang kalihukan kabahin niini.

Matud pa ni Franco nga sa pagka karon adunay gitukod nila nga detachment sa Bohol, Leyte ingon man sa Negros Oriental.

Samtang ang katukoran sa detachment gihimo usab nila dinhi sa probinsya sa Sugbo.

Nagkanayon si Franco nga nakita nila ang dakong kadaut kon dili masanta kining mga tawo nga nalambigit sa illegal nga kalihukan ilabi na gayud sa pagpangisda.

Nanawagan hinuon si Franco sa mga opisyal lokal sa pagpakita usab nga sila seryuso sa susama nga kampanya.