2 ka menor de edad 'namusil' o Nagtingkagol sa police detention cell

Nagtingkagol karon sa kwerpo sa kapolisan ang duha ka menor de edad human ang duha napasanginlang namusil sa usa ka lalaking nanagpa og uyab nga ilang silingan diha sa barangay Sawang Calero ning dakbayan sa miaging gabii.

Ang napusilan giilang si Jeffrey Villaragot,31, ulitawo ug nagpuyo sa sitio Ilang-ilang sa samang barangay samtang ang mga nadakpan human misuway og ikyas giilang sila si Vladimir,17, ug Cresente,16.

Sigun pa ni SPO2 Jay Yballe sa Banat News ang duruha posibleng mipalit sa away sa manag-uyab sanglit si Villaragot sa sayo pa gikatahong gikalalis ang iyang uyab nga naila sa ngan nga Jenny.

Niadtong tungura gumikan sa kainit sa panaglalis giingong nasagpaan sa biktima ang babaye maong milakaw ang babaye nga nagbagulbol og bahad.

Sigun pa sa inahan sa biktima nga si Anacleta,53, giingnan siya sa uyab sa iyang anak og "sorry nalang daan nang, ingna iyang mga igsuon," dayon kunong lakaw sa babaye.

Dangtan pila ka gutlo ang biktima gikatahong naghubog diha sa dalan Tupaz sa naasoy'ng barangay apan kalit lang giduol sa duha ka mga menor ug way daghang pahibalo gipusil ang ulo niini.

Daling miikyas ang mga suspek samtang gidala sa tambalanan si Villaragot kinsa naa sa kritikal nga kondisyon.

Si barangay Konsehal Lito Delos Reyes ug SPO2 Jaime Milatar sa Taboan Police Station maoy nakadakop sa mga batan-on dihang nangikyas kini ug kasamtangang gitanggong karon sa karsel sa Cebu City Police Office.

Asoy pa ni Yballe ang duruha ka suspek mga silingan lang sa uyab sa biktima ug posibleng mipalit lang sa away sa manag-uyab.