Gipusil, unya giluba

Gwardiya gipusil dayon giluba og bolo patay diha sa gibantayan niining private resort sa barangay Tapilon lungsod sa Daan Bantayan sa milabay'ng Miyerkules sa gabii.

Patay nang napalgan sa caretaker sa The Cliff Resort ang biktimang si Antonio Gader, 50, minyo ug molupyo sa Pangpang, sa samang barangay nga napuno og samad dinunggaban ug pinusilan diha sa buko-buko.

Ang tag-iya sa maong resort mao si James Jones ug gidumala kini karon sa igsuon sa iyang asawa nga si Barangay Konsehal Bonifacio Sanchez.

Matud pa ni SPO1 Carlos Condino sa Banat News nadunggan nalang sa caretaker nga si Ely Navarro ang mga buto sa armas de fuego gikan sa gawas maong iya kining gisusi.

Mao lay iyang nakit-an ang biktima nga nagkaob sa ubos ug nagkadugo ug wala nay kinabuhi maong gidali nila kini og sumbong ngadto sa kapolisan.

Matud pa ni Condino layo ra ang motibong pagpangawat ang hinungdan sa pagpatay ug posibleng personal nga panagbingkil ang motibo.

Ang biktima gituohang giduslak una sa nahibiling bolo una pa pusila tulo ka higayon ang buko buko niini hinungdan sa hinanali niining kamatayon.