Koreano gikulata sa mga paisano

Midangop sa buhatan sa Station 2 sa Mandaue City Police Office ang usa ka Korean national human kini gitabangan og bukbok sa iyang mga kababayan diha sa sulod sa usa ka sikat nga diskohan sa dalan A.S. Fortuna barangay Bakilid dakbayan sa Mandaue.

Wala makapanapo si Cho Kyu Seok,49, ulitawo ug kasamtangang nagpuyo sa Marian Pension House sa Barangay Maguikay sa naasoy'ng dakbayan human kini tabangi og kulata sa duha niini ka kababayan.

Giila sa biktima nga mikulata kaniya mao si Yang Koung Yong, 42, ulitawo ug molupyo sa Gentle Breeze, sitio Panagdait barangay Mabolo ning dakbayan ug usa ka wa mailhing Koreano nga kauban sa suspek.

Sigun pa ni PO3 Dindo Montesclaros sa Banat News nga samtang ang biktima naglingaw diha sa maong diskohan kalit lang siyang giduol sa duha ka mga suspek ug walay daghang istorya gibunalan siya og plastik nga bangko ni Yong.

Dihang mibarog ang biktima aron unta komprontasihon si Yong nakugang nalang si Seok dihang gihapak siya og wala matinong kalibre sa armas de fuego diha sa nawong sa kauban ni Yong.

Ning tungura walay nahimo ang biktima kundili ang pag-ikyas ug pagtaho sa kapolisan sa nahitabo samtang ang mga suspek wala na masikop sa kapolisan.