Hinabang sa fire victims gihangop

Gihangop sa mga mulopyo sa sitio Sampaguita sa barangay Banilad sa dakbayan sa Mandaue ang ayuda nga ilang nadawat gikan ni Presidente Gloria Macapagal Arroyo.

Si Mayor Thadeo Ouano uban sa iyang anak nga si Thadeo Jovito "Junkie" Ouano, iyang special assistant, maoy nangunay sa paghatag sa hinabang ngadto sa mga mulopyo.

Miabag usab sa paghatag sa ayuda si Kapitan Dianne Abanes sa barangay Banilad diin nahitabo ang sunog.

Matag tag-iya og balay nakadawat og P2,900 samtang ang mga nag-abang nakadawat usab og P1,300.

Si Mayor Ouano miingon nga angayan nga magpasalamat ang mga mulopyo sa sitio Sampaguita ngadto ni Presidente Arroyo nga mipagawas sa maong gahin gikan sa Presidential Social Fund.

Nahibaw-an nga una nang mipagawas og ayuda ang kagamhanan sa dakbayan ngadto sa mga biktima.

Pinaagi sa hangyo ni Mayor Ouano si Gobernador Gwendolyn Garcia mipagawas usab og gahin aron mahatag sa mga biktima sa sunog.