Fil-Am nag-wild

Usa ka American citizen nga Pinoy mibakasyon dinhi sa Sugbo ang gidakop human kini manghasi sa iyang mga silingan ug nanion og armas de fuego diha sa barangay Poblacion-Pardo ning dakbayan.

Ang grupo ni SPO4 Jaime Repompo ug PO2 Arnel Sanchez misikop kang Richard Bordas Salada, 30, minyo ug nagpuyo sa San Joaquin St. Stockton, California gumikan sa reklamo sa tulo ka mga silingan niini diha sa iyang gibakasyonan sa naasoy’ng lugar.

Usa sa mga reklamante mao si Roger Polugon, 56, kinsa giingong nabun-og sa pagdagmal ni Salada ug gitiunan sa wala matinong kalibre sa armas sa suspek. Laing mireklamo mao sila si Gloria Sanchez Polugon, 53, ug Delia Sanchez Abellana.

Sa pag-abot sa kapolisan walay nakuhang armas gikan kang Salada apan gumikan sa kahubog niini ug sa mga reklamo gitanggong kini sa karsel sa Pardo Police Station.