Mga negosyante pabor ni GMA

Mga negosyante gikan sa nagkalainlaing dakbayan sa Kabisay-an ang padayon nga misalig sa administrasyon ni Presidente Gloria Macapagal Arroyo.

Si magpapatigayon Roberto Go, presidente sa Cebu Chamber of Commerce and Industry, miingon nga nadawat niya kini nga kasayuran human usab sila opisyal nga mipadayag sa ilang baruganan.

Matud pa ni Go nga ang mga magpapatigayon dili lang dinhi sa Sugbo kondili sa uban nga lugar sa Kabisay-an padayon nga misalig sa liderato ni Presidente Arroyo.

Usa kini sa mga hinungdan dugang ni Go nga pabor sila nga magpabilin ang presidente sa iyang katungdanan.

Nagkanayon si Go nga ang mga negosyante nga nagbase sa kaulohan nga nanawagan nga si Presidente Arroyo moluwat sa katungdanan gamay ra kaayo itandi sa Kabisay-an og Mindanao lakip na gani sa Luzon.

Dako ang pagtuo ni Go nga ang ilang mensahe maabot sa mga negosyante nga nagbase sa kaulohan.