Suweldo sa mga trabahante sa ihawan usbawan

Nagtinguha si Mayor Thadeo Ouano nga mapausbawan ang suweldo sa mga kawani nga nagdumnala sa pagpadagan sa modernong ihawan sa barangay Labogon sa dakbayan sa Mandaue.

Kini iyang gipadayag ngadto sa mga tigbalita nga nakighinabi kaniya niadtong miaging adlaw human masayod nga migamay ang matag adlaw niining suweldo sa dihang ubos pa kini sa pribadong kompaniya.

Sumala pa ni Ouano nga mahimong P215 ang matag adlaw nga suweldo sa maong mga kawani nga gikan sa P185 nga matag adlaw nga gidawat niini.

Sa nahibaw-an nga ang maong mga kawani nga nagtrabaho kanhi sa AVM Bernardo Engineering ang nagdawat og suweldo nga P210 ngadto na sa labing taas nga P245 ang matag adlaw niini.

Gitugyan ngadto sa kagamhanan sa AVM Bernardo Engineering ang pagpadagan sa operasyon sa maong ihawan nga giabangan og P150 ang matag bulan sugod niadtong Hulyo 1 niining tuiga.

Nunot sa pagtugyan ngadto sa kagamhanan sa dakbayan ang maong pribado nga kompaniya nga nag-abangan sa maong ihawan ang napakyas kini sa pagbayad sa ilang binulan nga abangan nga mokabat na P4.8 milyones nga kantidad.

Sa nahibaw-an nga si Mayor Ouano ang mipaabang sa AVM Bernardo Engineering kinsa eksperto sa pagpadagan sa maong modernong ihawan sanglit mao man usab ang nag-ugmad niini niadtong Oktobre 2003.

Ang mga trabahante nga maoy nagpadagan sa operasyon sa maong ihawan ang gipabilin sa kagamhanan aron sa pagpadayon usab sa inadlaw niining operasyon.