Gi-abuso sa ama-ama sukad 13-anyos pa; nagsabak gyud

Nagmabdos ang usa ka 17 anyos nga dalagita kinsa miingong giabuso na sa iyang ama-ama sukad sa trese anyos pa kini hinungdan sa pagkabisto sa pagka-manyak sa kapuyo sa iyang inahan.

Sumala pa ni SPO1 Nonilon Esconilo sa Pinamungajan Police Station nga ang biktima maoy mitug-an sa iyang inahan kalabot sa pagmabdos niini ug iyang gitumbok ang iyang ama-ama (ngan gipugngan) nga maoy nakapamabdos kaniya.

Mitug-an usab ang biktima niadtong Hulyo 3 nga gisuwayan siya paglugos usab sa suspek apan nakahimo kini sa pagsukol hinungdan nga wala mahinayon ang dautang tuyo niini.

Ang kapolisan daling mipahiling sa biktima diha sa tambalanan aron masiguro ang kahimtang sa panglawas niini ug ingon man sa giingong mga samad nga naangkon gumikan niadtong pagsuway unta og lugos kaniya.

Apan ang suspek sa pagkahibalo nga nabisto na ang iyang binuhatan daling milayas sa maong lugar ug wala na igkita sa mga mirespondeng kapolisan.