Garci nia sa Cebu?

Gipanghimakak ni Regional Commission on Elections Director Atty. Salud Aliganga nga dia karon sa Sugbo ang kontrobersyal nga Comelec Commissioner Virgilio Garcillano magtago.

Si Salud mitug-an sa Banat News nga ulahing mibisita si Garcillano dinhi sa lalawigan niadtong wala pa moulbo ang isyu sa wiretapping nga giingong ebidensya sa oposisyon nga nanikas si Presidente Gloria Arroyo niadtong milabay’ng piniliay.

"Wala siya diri sa Cebu, adto hinuong wala pa siya mabuking, before mibuto ang balita dinhi siya, I don’t know kung naa ba siya dinhi but I doubt kung magpakita ba siya sa taga Comelec," asoy pa ni Aliganga.

Sigun pa ni Aliganga kun naa man galing kini dinhi sa Sugbo nakasiguro ang direktor nga wala kini moduol og mga lokal nga opisyal sa Comelec sanglit ang iyang mga sakop magduha-duha gyud tungod sa posibleng pagkaduhig sa isyu.

Midugang si Aliganga nga posibleng didto kini sa mga suod niining higala sanglit Bisaya man usab ang sinultihan ni Garcillano apan matud pa sa direktor dili tukmang dapit aron kataguan ang Cebu tungod sa kagamay niini ug kaaktibo sa media.

Sa iyang bahin, si Aliganga kabahin niining pagpanawag sa mga kandidato ngadto sa mga opisyal sa Comelec, miangkon siyang wala gyuy bisan usa ka higayon nga dunay mitawag kaniya nga mga kandidato niadtong nakalabayng piniliay.

Sigun pa niini kun mahitabo man walay makuhang pabor ang maong mga kandidato kun kini mosupak na sa iyang prinsipyo.

Hinuon gibutyag sa direktor nga dili kalikayan nga matawgan ang usa ka opisyal sa Comelec sa mga kandidato apan desisyon na kini sa mga opisyal kun magpagamit sa sayop nga pagpangayo og pabor kay matud pa niya dili tanang opisyal sa Comelec mga santos.