Gloriagate tape way tikas sa Cebu

Walay nahitabong pagpanikas dinhi sa Sugbo niadtong miaging piniliay. Kini maoy pagtuo ni 6th District Representative Nerissa Soon Ruiz human sa pagkadungog sa tulo ka oras nga "Gloriagate" tape nga gipadungog didto sa Kongreso ni Alan Paguia, kanhi abogado ni ex-President Joseph Estrada.

Si Ruiz sa usa ka interbyu sa usa ka sibyaanan dinhi sa dakbayan mitug-an nga layo ra kaayo sa pangangkon ni 4th District Clavel Asas Martinez kinsa nangangkong duna siya’y kaugalingong kopya sa maong tape nga naghisgut sa pagpanikas usab nga nahitabo dinhi sa Sugbo.

Sigun pa ni Ruiz nga sa tulo ka oras nga tape ang nadunggan lang sa Kongreso nga may paghisgut sa Sugbo mao ang tingog sa usa ka lalaking nagmando nga iproklamar na si Gobernador Gwendolyn Garcia.

Matud pa sa kongresista nga ang maong tawag nga naghisgut sa Sugbo aron iproklamar si Garcia isip mananaog pagka-gobernador gihimo human na ang eleksyon ug ang iskutenyo.

Midugang si Ruiz nganong langayon paman ang proklamasyon sanglit ang katawhan sa lalawigan nasayod nang daan kung si kinsay midaog niadtong panahuna.

Nawad-an na usab og interes si Ruiz nga maminaw sa giingong kaugalingong kopya sa tape ni Martinez sanglit nadungog naman tanan didto ang kinahanglang paminawon sa tulo ka oras nga tape ni Paguia.

Giingong atol sa public hearing niadtong milabay’ng adlaw si Paguia nangangkong wala kini masayod kun asa naggikan ang maong tape apan gahapon miangkon na kini nga gikan kadto kang kanhi Senador Francisco Tatad nga gihatag kaniya niadtong Mayo 15, 2005.

Giklaro ni Ruiz nga bisan sa pagkadungog sa maong tape dili pa makasiguro kung mao ba gyud kadto ang orihinal nga tape sanglit dunay posibilidad nga na-alter na kadto.

Daan nang mihangyo si Paguia sa wa pa kini motumaw sa kongreso nga dili niya ipadungog ang kinatibuk-ang sulod sa tape sanglit dunay mga pribadong panag-istoryahay sa mga tawo apan mismong si Cavite Rep. Gilbert Remulla mipasalig nga ang subpoena sa Kamara mahimo nang taming ni Paguia aron dili mapasakaan og kasong kalapasan sa anti-wiretapping act.

Gikatahong pipila sa mga kongresista nga nakadungog sa maong tape miangkong nakatawag usab sila kang Virgilio Garcillano apan nahibulong sila sanglit wala man sila didto sa maong tulo ka oras nga tape ni Paguia.

Ang maong tape maoy nakaingon sa kagubot sa politika sa nasud tungod sa pasangil nga nanikas ang administrasyon sa milabayng piniliay nga gipanghimakak usab sa palasyo.