Prinsipal ibalhin aron way gubot

Girekomendar kagahapon ni Mayor Socrates Fernandez sa Talisay ang pagpabalhin ni Velma Taboada prinsipal sa San Isidro Elementary School ngadto sa laing tunghaan.

Matud pa ni Fernandez nga aron paglikay sa kagubot sa maong tunghaan ug paghatag og katagbawan sa mga ginikanan ug sa mga estudyante sa ilang protesta batok ni Taboada maayong ibalhin na lang si Taboada.

Si Fernandez nanawagan ngadto sa mga ginikanan nga pabalikon na sa pagtungha ang ilang mga anak.

Kagahapon sa buntag ang mga opisyales sa Peace Committee Division sa Department of Education (DepEd) sa Talisay mipahigayon og dyalogo tali sa mga ginikanan ug sa mga opisyales sa barangay San Isidro.

Ang mga opisyal sa DepEd miawhag sa mga ginikanan nga pabalikon na sa pagtungha ang ilang mga anak samtang gihimo pa ang imbestigasyon batok ni Taboada.

Si Division Superintendent Elsa Suralta nangayo og kopya sa petisyon sa mga ginikanan batok ni Taboada aron ila dayon kining mabuhatan og aksiyon.

Kagahapon sa buntag ang ubang ginikanan sa maong tunghaan padayon gihapon sa ilang gibuhat nga protesta batok ni Taboada pinaagi sa wala pagpatungha sa ilang mga anak.