Pe dili motuo may jueteng na

Kulang og pagtuo si Konsehal Augustos Pe nga migamot na ang ilegal nga sugal sa jueteng ilabi na dinhi sa dakbayan sa Sugbo bisan pa sa pagkasakmit sa mga kagamitan sa maong ilegal nga sugal sa Sitio Kanaas, barangay Guadalupe niadtong Sabado.

Gituohan ni Pe nga posibleng sinugdanan pa unta nga pag-operate sa maong ilegal nga sugal dinhi sa Sugbo ang maong nadiskubrehan ug gironda sa kapolisan.

Nunot niini, morekomendar ang konsehal ngadto kang Mayor Tomas Osmeña sa paghibalik unya niini dinhi sa dakbayan nga pahatagan og ganti o ba kaha pasidungog ang mga sakop sa Criminal Investigation and Detection Group (CIDG-7) nga maoy nakasakmit sa mga kagamitan sa sugal nga jueteng.

Nagkanayon ang konsehal nga usa ka maayong senyales ang malampusong pagpangronda sa kapolisan batok sa gituohang sugal nga jueteng tungod kay nakapakgang kini sa mga jueteng operator nga nagtinguhang mo-operate dinhi sa Sugbo.

Samtang gipadayag sab ni Pe nga wala na kinahanglana pa nga ipaubos sa imbestigasyon ang hepe sa Guadalupe Police Station Major Pedrillo Villamor gumikan kay miangkon na kini nga wala gyud silay kalibutan ning pagsulod karon sa jueteng sa maong barangay. - Darrel Carumba PE