Boy Herrera: 'Gloria resign'

Kanhi Sugbuanong senador nga si Ernesto Herrera miawhag kang Presidente Gloria Arroyo sa pagbiya na sa pwesto tungod kay nawad-an na kini og suporta gikan sa katawhan tungod usab sa pag-angkon niini nga nakahimo og sayop niadtong milabay'ng eleksyon.

Si Herrera sa usa ka interbyu sa lokal nga sibyaanan, nagkanayon nga bisan wala ilha ni Arroyo kung kinsa kadtong lalaki nga gikaistorya niini nga usa ka opisyal sa Comelec sigurado siyang si Virgilio Garcillano gyud kadto bisan ang naulahi mihimakak na niini.

Mipasangil si Herrera nga ang giistoryahan diha sa kontrobersyal nga "Hello Garci" tape ug sa resulta sa eleksyon mitukma gyud diin nagpasabot nga duna gyuy tikas nga gihimo ang administrasyon.

Miingon si Herrera isip usa ka responsableng lider dili lang niini angayan nga huna-hunaong protektahan lang ang iyang botos kundili ang tanang botos diha sa Comelec dili lang sa administrasyon.

Si Arroyo sa pag-angkon niini ug pagpangayo og pasaylo mirason nga mitawag siya sa usa ka opisyal sa Comelec aron sa pagprotektar sa iyang botos, apan kini gisupak ni Herrera ug midugang nga duna gyu'y kapasikaran nga ilisan si Arroyo pagkapangulo tungod kay nakalapas kini sa konstitusyon.

Si Herrera maoy usa sa mga naparot nga senador nga milansar adtong milabay'ng piniliay ilawom sa partido sa naparot nga si Fernando Poe Jr. apan giklaro niini nga wala siya mag-apil-apil sa mga kalihukan karon sa biyuda ni Poe nga si Susan Roces kinsa usa sa mga nanawagan alang sa pagpalagpot kang Arroyo.