Nisakiyo sa P2M wa pa hiilhi sa polis

Ang kapolisan daw naglisod gayod sa pagtumbok sa tulo ka wala hiilhing tawo nga mga armado nga maoy suspetsado sa pagpanulis nga nahitabo sa dalan Hernan Cortes ug eskina A.S. Fortuna sa siyudad sa Mandaue nga mokabat sa P2 milyones nga kantidad nga payroll money ang nasakiyo.

Nunot niini si Mandaue City Police Director Senior Superintendent Florante Lamosao ang miluwat na karon og kamandoan sa tanang kuwerpo sa kapolisan sa maong dakbayan sa paggukod sa mga responsable nga maoy nagtulis sa mga biktima.

Si PO3 Jun Mondejar, imbestigador sa Presinto 4 sa Casuntingan Police Station sa nahisgotang dakbayan sa follow up nga gihimo maoy iyang gipadayag nga ang kakuwang sa tukmang koordinasyon sa biktima ngadto kanila mao karon ang nakahatag kanila og kalisod sa pag-ila sa mga tulisan .

Matud pa ni Mondejar nga ang biktima nga si Cristopher Yu nga tag-iya sa Premier Shipping Corporation sa maong dakbayan ug ang kuyog niining kawani nga si Lizlee Simon, hingkod ang panuigon ang igo lamang nga nagpadala og representante ug dili kini makahatag sa insaktong detalyeng itaho niini ngadto kanila sa maong insidente.