Ang biktima nailhan nga si Joselito Garcia, 66, taga Talisay.
Biyudo na ang maong biktima hinungdan nga nag-inusara lamang siya sa iyang payag.
Dihang gikaon na sa kayo ang iyang pinuy-anan, wala na siya makadagan kay ang kayo didto man magsugod sa pultahan.
Maayo nalang kay naka-alinggat ang iyang mga silingan, ilang giluwas ang biktima pinaagi sa pagguyod niini ngadto sa gawas sa balay.
Wala na kapugngi ang kayo nga dali kaayong miugdaw sa mga kawayan ug nipa nga sawog ug bongbong ug atop sa maong payag.
Ang biktima nahiagom sa second degree burns sumala pa sa mga mananambal sa hospital sa Oslob diin didto ihatod ang maong biktima.
Matud pa sa taga hospital kinsa maoy gisuginlan sa mga saksi, nga nagtapa og lubi ang biktima kay dili man niya kini ikabuwad sa init tungod kay nagpunay man og uwan didto.
Ang maong pagtapa maoy paagi aron mauga og makopras ang lubi ug ikapatimbang kini ngadto sa mamamalit niini.
Apan wala mabantayi sa biktima nga siga na kaayo ang kayo sa ilawom sa silong nga mikaon na sa iyang sawog nga kawayan diin didto iladlad ang bag-ong linugit nga lubi.
Tungod kay nakatagpilaw ang tiguwang didto sa suok sa iyang payag mao nalay iyang namat-an nga misilaob na ang kayo nga mikaon na sa iyang tibuok sawog ug bongbong.
Misinggit nalang siya og panabang sa iyang mga silingan hinungdan nga naluwas siya.