E-VAT dako og epekto

Gipaabot nga dako og epekto sa katawhan ang pag-implimentar sukad kagahapon sa expanded value added tax (E-VAT), apan ang kagamhanan nagkanayon nga gihimoan na kini karon og paagi aron dili kaayo mabatyagan sa katawhan.

Si Presidente Gloria Arroyo kinsa nag-atubang karon og impeachment complaint gumikan sa mga isyo nga gibato kaniya ug sa iyang banay gipanglantawang mas mosamot nga mawad-an og suporta gikan sa katawhan kun mabatyagan sa katawhan ang pagsaka sa buhisan.

Hinuon si Finance Secretary Cesar Purisima miingon nga gipangitaan na og paagi nga dili grabe ang impact sa panginahanglanon sa katawhan ang implementasyon sa EVAT.

Samtang napanglantawan ng daan nga mosaka gyud ang presyo sa produktong petrolyo apan gipasalig sa gobiyerno nga dili kini makapatuyang. Ang industriya sa lana, enerhiya ug ubang mga industriya ang gikuhaan og tax exemptions ug gipatas-an usab ang 35 porsiyento ang corporate income tax sa bag-ong EVAT.

Ang bag-ong EVAT giaprobahan ni Arroyo adtong bulan sa Mayo nga naghatag kaniya og gahom nga patas-an kini gikan sa 10 ngadto na sa 12 porsiyento karong Enero sa sunod tuig kun dili kontento sa koleksyon ang gobiyerno.