Meat inspector sa Talisay girekomendar relibohan

Girekomendar ni Talisay City Administrator Aurora Econg ang usa ka meat inspector sa dakbayan sa Talisay nga maparelibohan tungod sa pag-isyu niini og sertipikasyon sa mga baboy bisan wala ihawa sa bag-ong ihawan sa Barangay Biasong.

Si Loida Debalucos ipabalhin sa laing buhatan human kini masakpi nga miisyu og meat inspection certificate (MIC) niadtong Hunyo 26 ug 27 ngadto sa tag-iya sa walo ka baboy nga giihaw nang daan gikan sa gawas.

Si Econg nagkanayon nga giduso na niya sa Human Resource Department ang pagbalhin ni Debalucos tungod sa kalapasan niini sa National Meat Inspection Law.

Matud ni City Veterinarian Galileo Larawan nabalaka nga kun magpadayon ang gibuhat ni Debalucos matangtangan og accreditation ang dakbayan gikan sa National Meat Inspection Commission (NMIC). Si Debalucos mihimakak sa pasangil ug nagkanayon nga off duty siya niadtong Hunyo 26 sa dihang misulod ang van nga gikargahan sa tulo ka baboy nga giihaw nang daan sa gawas sa bag-ong slaughterhouse. Dugang niya, sa Hunyo 27 mi-absent siya.

Niadtong Abril, si Debalucos giingong miisyu usab og sertipikasyon sa 45 ka manok nga giihaw sa gawas.