'Nanghingi' sa pildero sa sugal giluba

Usa ka tawong "nanghingi" o nangayog P3 sa usa ka pildero sa tong-its, kay iyang ipalit og "Kulapo" gidunggab sa naulahi didto sa Langtad, Naga niadtong Martes sa gabii.

Gibutyag ni PO3 Edwin Yngayo, desk officer sa Naga Police Station sa Banat News nga nasabak sa apapangig ug dughan pinaagi sa tres kantos nga kotsilyo si Allan Victor Canonigo, 28, taga Langtad.

Wala hinuon kini maintimano kay nadala pa man sa Minglanilla District Hospital.

Apan sa suspetsado nga si Rene Sayapoc alias Ariba, giingong misibat human sa hitabo ug wala kini hidakpi sa kapolisan.

Matud pa sa imbistigador nga nagtambong og sugal nga tong-its ang biktima ug ang suspetsado.

Ang biktima giingong hubog kaayo samtang ang suspetsado pildero usab sa sugal.

Maoy hinungdan nga sa kasipok sa iyang ulo, napikon dayon kini dihang gipangayoan siyag P3 sa biktima kinsa giingong nagsusapinday na sa kahubog.