Pag-endorsar sa impeachment case nakapaukay

Pag-endorsar sa impeachment case sa usa ka pro-administration congressman batok ni Presidente Gloria Arroyo nakapaukay ug nakamugna og kaguliyang tali sa mga kongresista sa House of Representatives kalabot sa tinuoray nga motibo niini.

Gidudahang ang maong aksyon usa ka pamaagi nga motabon sa legal nga proseso nga mas makaayo sa nasud sanglit gituohang kini gihimo aron maprotektahan si Arroyo kun ugaling kini dili mosaler.

Si Alagad Partylist Representative Rodante Marcolena miyembro sa impluwensyal nga Iglesia ni Cristo namahayag sa mga sakop sa media nga tuyo sa maong impeachment case aron maklaro ang mga pasangil batok kang Arroyo.

Tuyo niini nga matuki kun duna bay nahimong kalapasan ang pangulo ug kun gitraydor ba niini ang katawhan sanglit ang oposisyon namahayag naman nga nawad-an na og pagsalig ang mga Pilipino sa lider sa nasud.

Gihulagway ni Marcolena nga mas maayo ang maong lakang kun itandi sa paghimo og mga protesta sa kadalanan nga nakamugna og kasamok.

Sa laing bahin, si manlalaban Oliver Lozano kinsa misang-at usab og kasong impeachment batok ni Arroyo mihagit sa minoriya nga mohimo og mas maayong reklamo o di ba kaha iuban na lang sa complaint.

Si Lozano mireklamong gitraydor sa pangulo ang katawhang Pilipino pinaagi sa pagpanikas niadtong milabay'ng piniliay base sa sulod sa kontrobersyal nga "Hello Garci" tape.

Midugang siya nga dili kadto makausa lang gibuhat ni Arroyo kun basehan ang pangangkon niining nasipyat ra sa pagtawag sanglit 14 ka higayong gitawgan ni Arroyo si Commissioner Virgilio Garcillano.

Sa balaod, dili mahimong makaduha pasakaan og impeachment complaint ang usa ka pangulo sa nasud sulod sa usa ka tuig, ug gituuhan karon sa oposisyon nga usa ka paagi sa pag-rescue ang gihimo sa mga misumitir og reklamo batok kang Arroyo sanglit nakasiguro silang dili kini molahutay sa debate.q