Talisay 'kaya' mohatag rice bonus

May igong kapasidad ang dakbayan sa Talisay City paghatag og P1,500 nga "rice allowance" matag buwan sa mga kawani sa kagamhanan matud pa ni City administrator Aurora Econg.

Apan ang gipaabot sa kagamhanan sa Talisay mao ra ang pag-uyon sa Malacañang niini.

Sa sayo pa ang taga Malacañang nangutana kon may igo bang kapasidad ang Talisay sa paghatag ning binuwan nga binipisyo sa mga regular nga kawani.

Kini tungod kay way laing mopas-an niini gawas sa kagamhanan sa Talisay, matud pa ni Director Marieta Tamundong, sa presidential Management Staff sa Malacañang.

Gipasalig ni Econg nga gisandig sa kagamhanan ang tanan gikan sa kinitaan sa buhis sa yuta ug kabtangan niini.

Sa pagkakaron nakita ni Econg ang nag-uswag nga koleksyon sa buhis gikan sa kayutaan ug mga kabtangan nga gipanag-iya sa taga Talisay.

Busa alang kang Econg dili maglisod ang kagamhanan pagtuman ning maong binipisyo nga maoy gipasalig sa administrasyon ni Mayor Socrates Fernandez.

Ang rice allowance maoy binuwang dawatonon sa matag kawani nga regular sa kagamhanan sa Talisay.

Mahimo ang ubang mga dakbayan wala motanyag niini, apan ang Talisay mipakita ning maong kaayo agig pasalamat nila sa tanan nga nakighiusa sa kauswagan sa Talisay.

Si Mayor Fernandez sa iyang bahin nagkanayon nga walay lain silang gipaabot kundili ang suwat nalang gikan sa Malacañang nga nagtugot nga ikapatuman na sa Talisay ang maong gimbuhaton.

Sayo ning tuiga mipadala og suwat si Fernandez ngadto sa Malacañang sa pagpahibawo ning maong programa sa paghatag og rice allowance ngadto sa empleyado sa dakbayan.