Tindahan gitulis sa tulo ka tawo

Gitulis sa tulo ka wala hiilhing lalaki nga nagsakay og motorsiklo ang usa ka tindahan sa sitio Basak Merkado, barangay Basak, siyudad sa Lapu-Lapu alas 3 pasado ang takna sa hapon niadtong Sabado.

Ang gitulis mao ang agrivit supply nga tindahan nga gipanag-iya ni Lizzel Demecillo, 33 anyos, minyo nga nagpuyo usab sa barangay Basak, siyudad sa Mandaue.

Ang nasakiyo sa mga tulisan gikan sa biktima mao ang shoulder bag niini nga itom nga gisudlan sa duha ka cellphone nga 11000 nokia nga may sulod ang load wallet nga P5,000 ug 3210 nga P1,000 usab ang load wallet ug salaping cash P500 nga ilang halin.

Si Demecillo nga gisukitsukit sa mga imbestigador sa theft and robbery section sa kapolisan sa nahisgotang dakbayan maoy gipadayag niini nga tulo ka tawo nga nagsakay sa itom nga motorsiklo ug mihunong kini sa atbang sa ilang tindahan.

Matud pa ni Demecillo nga nagpabilin sa motorsiklo ang usa ug ang duha maoy milabang paingon sa ilang tindahan ug ang usa lamang niini maoy misulod sanglit nagpabilin man ang kuyog sa gawas may pultahan nga maoy lookout.

Dugang pa niya nga nagpakaaron-ingnon lang nga kustomer ang misulod sa ilang tindahan pinaagi sa pagpalit og usa ka kahang sigarilyo apan dihang gitunol sa ilang tindira kalit usab niining giibot ang pistola dayong deklarar og tulis.

Human sa maong pagpanulis ang duha namalik sa nagpaabot nilang kauban ug nagdali sa pag-angkas sa ilang motorsiklo ug mibulhot kini sa pagpadagan paingon ngadto sa barangay Marigondon sa maong dakbayan.