Presyo sa mga palaliton gibantayan

Higpit karon nga gibantayan ang mga presyo sa nag-unang palaliton sa dakbayan sa Mandaue sanglit may pipila ka mga negosyante ang mopahimulos niini sa pagbukas na usab sa tuig tingtungha niadtong June 6 niining tuiga.

Si Mayor Thadeo ang nitahas na karon og mga tawo nga maoy mag-monitor sa mga nag-unang palaliton sa dakbayan nunot usab sa nagpadayon karong pag-usbaw sa produktong petrolyo.

Si Mandaue City Public Market Administrator Antonio Taylo nga gikahinabi sa mga tigbalita ang mipadayag nga gawas sa ilang pag-monitor sa presyo sa mga palaliton ang mga timbangan nga gigamit sa manindahay ilang ilakip pagsusi.

Gipasabot ni Taylo nga ang ilang gihimo nga pagsusi sa mga timbangan nga gigamit sa mga manindahay sa merkado mao lamang ang pagprotihir sa mga mamalitay sa merkado publiko sa dakbayan nga dili usab mabintahaan.

Giklaro niya nga may mga timbangan nga gigamit sa mga manindahay nga naglakip sa isdaan, karnihan ug uban pa nga depektoso ang timbangan nga gigamit ang ilang gipamulta ug P500.

Subay usab kini sa ordinansa nga gipatuman sa kagamhanan sa maong dakbayan nga higpit gayod nga nagdili sa mga manindahay sa paggamit og depektoso nga timbangan.

Dugang pa ni Taylo nga ang mga planggana ug bandihado nga gigamit nga sudlanan sa mga manindahay og isda o sa karne ang adunay ilang gipatapot nga selyo.

Ang tumong niini nga dili magpatuyang ang mga manindahay sa paggamit og sudlanan sa pagtimbang nga morisiko na hinuon ang gipalit kay bug-at na daan ang gigamit nga bandehado o planggana.

Si Taylo miingon nga gidayeg gayod ni Mayor Ouano ang mga manindahay sa merkado publiko sa dakbayan sanglit dako kini og gikatabang alang sa kalamboan pinaagi sa gibayad niining buhis ngadto sa kagamhanan.

Kini ang nakadasig kang Mayor Ouano ang naningkamot gayod nga maugmad ang modernong merkado aron sa pagpahiluna sa maayong lugar isip pagdasig usab kanila nga magpadayon sa pagpakighiusa alang sa kalamboan ug mga programa nga iyang gipatuman.q