Kinawat nga butang nasubay

Gidemalas ang usa ka manglungkabay dihang nasubay sa mga kabanay sa iyang biktima ang mga giingong nakawat niini gikan sa usa ka panimalay diha sa Barangay Poblacion, lungsod sa Dalaguete.

Si Oliver Selerio, hingkod ang panuigon ug molupyo sa maong barangay nagtingkagol na karon sa karsel tungod sa pagtabang sa usa ka Engelbert Villanueva sa mga sa paryente sa biktimang si Hazel Pasigma , 24 aron masubay ang mga nakawat nga butang.

Sigun pa sa kapolisan kasamtangang nangatulog ang biktima uban sa iyang katabang dihang misulod ang suspek sa pultahan sa kusina ug mideretso sa pagkuha sa kuwarto ni Pasigma.

Ang mga nakuhang kabtangan sa biktima mao ang duha ka Nokia cellphone nga nagkantidad tanan og P21,500, cash nga P2,500 ug mga importanteng ATM cards sa biktima.

Hinuon ang tanang mga butang nabawi ra usab sa biktima samtang gikatakdang pasakaan og kaso karong adlawa ang suspek.