Namatay sa Bun-og:Construction worker gitabangan kulata sa kauban sa inom

Patay na ug nabulit sa bun-og ang kalawasan sa usa ka construction worker dihang nakaplagan sa kasagingan sa Barangay Tungkop, lungsod sa Minglanilla sa milabay'ng Sabado.

Giila ang biktima mao si Joseph Capua,39, bulag sa asawa, lumad nga taga Leyte ug kasamtangang nagpuyo sa Barangay Panadtaran, lungsod sa San Fernando ug trabahante sa Gorones Construction.

Duha sa mga gidudahang responsable nagtingkagol na sa karsel sa Minglanilla Police human kini gitudlo sa usa sa mga gikainom sa mga suspek una pa ang pagkadiskubre sa biktima samtang usa usab ang nakaikyas.

Ang gitumbok nga maoy mipatay kang Capua mao sila si Jescel Mocoy ug Carmelito Alicaya alyas Pidot pulos hingkod ang panuigon ug molupyo sa Barangay Tungkop sa naasoy'ng lungsod ug ang milayas mao si Renato "Rainier" Tañola, ang tulo pulos mga kauban sa biktima.

Si Jason Chiong kinsa usa sa mga gi-pick up sa kapolisan maoy mitumbok sa tulo nga maoy gikauban sa biktima nianang pagka-gabii diin sila mag-inom sa usa ka tindahan nga gipanag-iya sa usa ka Jephone Pundador diha sa barangay Tunghaan tabok sa kalsada.

Si SPO1 Romeo Barde ang imbestigador sa kaso mibutyag sa Banat News nga gipananghiran pa ni Alicaya si Chiong nga duna silay adtuon diha sa kasagingan uban sa biktima ug nila ni Mocoy ug Tañola ug mibilin pa sa iyang pitaka si Alicaya sanglit mobalik ra dayon sila.

Dangtan og pila ka minutos mibalik si Tañola nalang ug si Alicaya ug nagpadayon sila sa ilang pag-inom.

Sumala pa ni SPO1 Barde gumikan sa kahubog ni Tañola nadailos ang dila niini sa pag-ingon kang Chiong og "Son, mahibawo nalang ka ugma og dili sunod adlaw nga….aw ayaw nalang oy! Kini si Pidot maayo gyud kaayong tawo molaban gyud og amigo."

Si Alicaya kinsa hubog na usab mibukhad ang dughan sa pagdayeg ni Tañola mitubag usab kini og "Bitaw Son, molaban gyud ko og barkada duna gani ko gibirahan sa Abuno misuka og dugo," ug giingong miasoy pa nga dili siya moila og barkada.

Gikatahong mihaylo pa si Alicaya sa grupo aron pagpakita sa ilang pagkamatinud-anon sa panaghigalaay pinaagi sa pagpaso sa ilang mga bukton og sigarilyo, human niadto namauli ang grupo.

Nianang pagkabuntag gipukaw si Jason sa iyang inahan nga dunay patayng tawo nga nakaplagan diha sa kasagingan ug dihang iyang gisusi nakugang kini dihang ang maong tawo mao si Capua nga maoy gidala sa grupo nila ni Alicaya.

Nagtuo si SPO1 Barde nga gitulis ang biktima sanglit mao pay pagkubra sa biktima sa iyang suweldo nianang Biyernes, gihuboan usab sa iyang pantalon si Capua.

Usa ka tubo nga may gitas-ong duha ka tiil ang nakuha sa kapolisan diha sa crime scene nga gituohang maoy gigamit sa pagpatay.