Clavel gikataw-an lang sa mga Garcia

Gikataw-an lang sa duha ka magsuong Garcia ang pagpabuhagay ni Kongresista Clavel Asas Martinez sa "Cebu version" sa "tape" nga nag-ingong ebidensya nga dunay pagpanikas nga nahitabo atol sa piniliay adtong eleksyon.

Si Provincial Consultant Pablo John Garcia ug maguwang nga si Winston Garcia ang presidente sa Government Service Insurance System (GSIS) parehong mipakagamay sa gibuhat ni Martinez didto sa gihimong House hearing sa kontrobersyal nga "tape" sa kongreso.

Si Pablo John sa pakighinabi sa DyLA radio kagahapon mipadayag nga "nasurpresa" siya ingon man usab wala "masurpresa" sa gihimo sa higpit nga ribal sa politika sa ilang pamilya.

Sigun pa ni Pablo John nga nasurpresa siya tungod kay wala niya damhang mahimo sa kongresista ang pagpagawas sa maong isyu sa "Cebu version" nga tape, ug ingon man usab nga wala na siya masurpresa kay daan na kini nakahibalo sa tinuoray nga batasan ni Martinez.

"Surprised but not surprised but most of all in the end I am amused,"pasiaw pa sa provincial consultant.

Mipasangil si Pablo John nga nabuhat kini ni Martinez aron sila makabawos sa mga Garcia. Ang mga Garcia ug Martinez maoy higpit nga managkabangga sa politika dinhi sa Sugbo.

Midugang si Pablo John nga kun dunay "loyalty check" nga himuon si Presidente Arroyo angayang unahon sa pagsusi si Kongresista Martinez tungod sa pamahayag niini nga nagduda siya nahimo para sa pangulo apan kusganon gihapong nangangkon miyembro kini sa mayoriya.

Hinuon gidayeg ni Pablo John sila si Kongresista Eduardo Gullas, Raul Del Mar ug Simeon Kintanar sa pagdepensa sa kadaugan ni Arroyo dinhi sa Sugbo, samtang si kongresista Martinez matud pa ni Pablo John susama og namasangil nga tikasan ang mga Sugbuanon.

Samtang si Winston Garcia sa samang interbyu lahi og tonada sa iyang igsuon, gihagit ni Winston si Martinez sa pagpagawas sa maong "tape" aron mapasusi usab niya og mga eksperto ug kun matinong siya ba ang naa sa tape nga gipasangil nga maoy kaistorya ni Garcillano.

Mibahad si Winston nga kun maprubar nga dili siya ang naa sa tape mipahibalo kini nga moreklamo unya siya og Ethics complain batok sa kongresista.