Hubog misulong sa silingan gitagud-tagod

Mag-uumang misulong sa iyang silingan ug giingong nanigbas mao hinuoy gitagud - tagod tigbas sa iyang gisuwayan og tigbas adtong milabay'ng adlaw diha sa sitio Homoc barangay Casomoroy lungsod sa Balamban.

Ang natagud-tagud, ang kalawasan giilang si Pedro Caburnay, 41, minyo ug molupyo sa naasoy'ng dapit human kini maoy natigbasan ug napatay sa gisulong nga si Victorino Generale, hingkod ang panuigon ug molupyo usab sa naasoy'ng lugar.

Base sa gihimong imbestigasyon sa kapolisan sa Balamban sayo pa kaayo nianang adlawa nakainom ug nahubog na si Caburnay ug sa walay igong hinungdan miadto kini sa balay sa silingang si Generale kinsa giingong iyang gikasungi.

Didto pag-abot sa biktima naabtan niining nagpakaon pa si Generale sa iyang mga anak ug walay daghang pangutana kalit nga gitigbas ang naulahi apan nakalikay kini.

Diha dayon daling mikuha usab sa iyang bolo si Generale ug misukol kang Caburnay ug nianang hitaboa naigo sa tangkugo ang naulahi hinungdan sa pagkahagba niini apan gisundan kini ug tigbas sa suspek hangtud nga nakabsan sa kinabuhi si Caburnay.

Human sa insidente mitahan sa iyang kaugalingon ngadto sa kapolisan si Generale kinsa mirason nga igo lang siya nanalipod sa iyang kaugalingon ug sa iyang banay.

Ang kapolisan sa Balamban mopahigayon pa og lawom nga imbestigasyon sa maong kaso, gikatahong sa pag-adto pa sa biktima diha sa balay sa suspek nagpunay kini og bagolbol.