Potensiyal sa patigayon

Tagbilaran City -Gihangop sa kadagkuan sa Department of Agriculture dinhi sa Central Visayas ang tinguha karon sa mga opisyal ning dakbayan nga matukod ang usa ka Bagsakan Center nga maoy kabutangan sa mga mag-uuma sa ilang mga utanon og produkto gikan sa kalungsoran.

Si Regional Director Eduardo Lecciones sa DA-7 nagkanayon nga dako gayud kaayo og ikatabang sa mga mag-uuma nga nagsalig sa ilang panginabuhian sa produkto sa umahan.

Matud pa ni Lecciones nga sa maong lakang dili na mapahimuslan sa mga adunay puhunan ang mga mag-uuma.

Nagkanayon si Lecciones nga mao usab unta kini ang angayan hatagan sa igong pagtagad sa mga opisyal lokal.

Si Mayor Dan Neri Lim mipahibalo nga tinguha sa iyang administrasyon nga matabangan ang mga mag-uuma sa nagkalain-laing mga lungsod sa probinsya sa Bohol.

Matud pa ni Mayor Lim nga adunay luna diha sa merkado sa dakbayan nga iyang gitagana alang sa maong katuyuan.