Rey Torres giputlan sa bitiis

Ang adbenturosong mga pagpanulis sa notadong tulisan nga si Rey Torres giisip nga matapos na sa hingpit kini human giputol adtong milabay'ng adlaw ang napusilang bitiis tungod sa peligro sa impeksyon.

Si Torres kinsa dunay dili momenus lima ka mga arrest warrant tungod sa kasong pagpanulis ug pagpatay dinhi sa lalawigan nahimong Central Visayas Most Wanted sukad pa sa milabay'ng tuig.

Ang doktor sa Cebu City Medical Center sa sayo pa mipahibalong nameligro si Torres nga ma-impeksyon kun dili kahatagan og hustong medisina human kini mapusili sa iyang walang batiis.

Gikatahong si Dr.Christopher Abbu nga maoy nag-atiman ni Torres maoy mihimo sa operasyon alas 10:45 sa buntag adtong Martes ug natapos kini pagka-alas 12:30, giisip nga gawas nga malayo na sa impeksyon si Torres luwas na usab ang Sugbo sa iyang mga posibleng himuon pang krimen.

Ang grupo ni Supt.Pablo Labra sa Criminal Investigation and Intelligence Branch sa Cebu City Police Office maoy nasugamakan ni Torres didto sa Barangay Monte Alegre, Aurora Zamboanga del Sur.

Gikatahong mas gipili ni Torres ang makigpinusilay sa mga operatiba sa kapolisan inay motahan sa malinawon hinungdan nga nakaangkon kini og duha ka samad pinusilan diha sa iyang walang tiil.

Sa pagdala kaniya dinhi sa Sugbo nagkaproblema ang asawa ni Torres gumikan sa gastos sa mga tambal nga kinahanglanon aron masalbar ang tiil niini sa pagka-impeksyon ug gangrina.

Si Mayor Tomas Osmeña kinsa maoy nangusog alang sa pagkaaresto sa notadong tulisan mibalibad sa paghatag og espesyal nga pagtagad sa hangyo sa asawa ni Torres aron tabangan sa gasto sa medisina .

Sa pakighinabi sa mga sakop sa media si Torres igo lang misulting "nagmahay ko" ug wala na modugang og detalye kun unsay gimahayan niini kun may kalambigitan ba sa krimen nga iyang nahimo.