Bugaw diay ang gi-salvage

Nailhan na ang tawong gituohang gi-salvage niadtong milabay'ng Domingo sa gabii diha sa may 1st Mactan Bridge sa Barangay Pajo dakbayan sa Lapu-Lapu. Giingong ang pagpamintaha sa isig-katawo maoy hinungdan sa pagpatay niini.

Giila ni Gingging Miro ang tawo nga mao ang iyang banang si Manuel Miro, 24, minyo ug molupyo sa Barangay Kamagayan ning dakbayan sa Sugbo kinsa usa ka bugaw sa mga babayeng nagbaligya sa ilang unod sa naasoy'ng lugar.

Si SPO2 Rolito Jumaoas sa Homicide Section sa Lapulapu Police mitug-an sa Banat News nga adtong milabay'ng Domingo sa gabii gisignit si Miro sa duha ka wala hiilhing mga lalaki ug pugsanong gipasakay sa usa ka taxi.



Gikatahong ang maong mga lalaki maoy gikasabot sa biktima sa sayo kay mangabang ang duha og babaye ginamit ang P500 isip bayad apan gikatahong si Miro duna pay laing duha ka kaubang bugaw nga maoy mipasa-pasa sa kuwarta.

Hangtud nga gibawi nalang sa duha ka kustomer ang bayad apan nasuko dihang ang P500 nga gipasa-pasa nabalik nga P50 na lang .

Nianang pagkalawom na sa gabii gibalikan si Miro sa mga gikatahapan ug pugsanong gipasakay sa taxi ug didto na kini gipusil sa ulo diha sa tiilan sa 1st Mactan Bridge sa dakbayan sa Lapu-Lapu.

Gisubay usab karon sa kapolisan ang posibilidad nga sakop sa Philippine Benevolent Missionaries Association si Miro tungod sa nakuhang usa sa tulo ka singsing diha kaniya susama sa singsing sa mga miyembro sa maong grupo.