PGMA di kinahanglan motingog - IT commissioner

Dili na kinahanglan pa nga moluwat og pamahayag si Presidente Gloria Macapagal-Arroyo mahitungod sa kontrobersiyal nga tape nga giingong panagsulti tali sa presidente ug komisyoner sa Comelec, sumala pa sa komisyoner sa Commission on Information and Communications Technology.

Si Commissioner Elberto Emphasis mitataw nga wala na kinahanglana ang paghimakak o pag-angkon ni Arroyo sa tape tungod kay posibleng produkto lamang sa modernong teknolohiya ang maong audio conversation.

Wala hinuon ipaklaro ni Emphasis kun mugna ba sa oposisyon ang maong tape aron mahimong basehan paghimo og destabilisasyon sa administrasyon ni Arroyo.

"People can manufacture conversations. Tungod na sa atong technology karon," matud ni Emphasis.

Kun motingog si Arroyo, mapuno sa bugalbugal ang iyang pagka-pangulo hangtod matapos ang iyang termino.

"Wala na ta'y mahumang trabaho kay magsige naman lang og tingog ang presidente to deny nga dili siya ang naa sa tape," matud niya.

Dili kalikayan nga kun molampos ang nagpasiugda sa maong tape conversation, posibleng gamiton gihapon kini sa umaabot batok sa presidente ug ngadto na sa mosunod nga mga presidente.

"Dili na na mo-undang nang isyuha."

Kagahapon, nagubot makadiyot ang Kongreso atol sa pagbukas sa House inquiry mahitungod sa kontrobersiyal nga tape human ang mga militanteng grupo nang-apod-apod og mga "Hello Garci" CDs sulod sa Batasan.

Ang supporter ni Fernando Poe Jr. nga si Linggoy Alcuaz nasakpan sa mga security personnel sa Batasan nga nanghatag sa maong CDs.