Agri-tourism gipalapdan

Bohol- Gipaluyohan sa Department of Tourism ang programa sa mga opisyal lokal ning probinsya nga nagpalambo sa kalihukan sa agrikultura nga mao usab ang paagi pagdani sa mga turista.

Si Secretary Joseph Ace Durano sa DOT miingon nga daghan ang mga paagi pagdani sa mga turista nga muduaw sa usa ka dapit dili lang sa limpyo og nindot nga dagat.

Giangkon ni Durano nga kadaghanan sa mga turista gusto nga maayo ang ilang pagkabutang og makita nila ang talan-awon nga dili makita sa ilang lugar.

Usa kini sa mga butang nga nakita ni Durano nga tan-awon pag-ayo sa mga opisyal lokal.

Nakita ni Durano nga maayo ang gihimo sa mga opisyal ning probinsya ilabi na gayud sa lungsod sa Ubay.

Ang agri-tourism sa lungsod sa Ubay mao karon ang gipasigarbo sa mga opisyal sa probinsya.

Nahibaw-an nga daghan na ang mga turista nga miduaw sa lungsod aron pagsaksi sa kalambuan niini ilabi na gayud kabahin sa agrikultura.

Si Gobernador Aumentado mipahibalo nga ang pagpalambo sa agrikultura nakadani usab kaayo og mga turista.