P6 nga plete mahimo na masingil - LTFRB

Dugang piso sa pletehan gitugutan dinhi sa Central Visayas sumala pa sa Land Transportation and Regulatory Board kagahapon ug mamahimo na masingil karong adlawa kun nakalukat na og "matrix" ang mga drayber.

Si LTFRB Chairman Maria Elena Bautista mipahibalong gi-aprubahan sa board ang dugang sa minimum nga pletihan sa pampublikong sakyanan tungod sa rason nga nagkasaka ang presyo sa lana ug ang gipaabot nga epekto sa expanded value added tax nga giingong mabatian karong Hulyo 1.

Si Nagkahiusang Drayber sa Sugbo(NADSU) Chairman Antonio Pogado sa pakighinabi sa Banat News mipadayag nga sabutan pa sa ilang organisasyon ang maong umento kung ila bang sundon o gikinahanglan pa ang pakig-diyalogo ngadto sa LTFRB-7.

Apan mipadayag na siyang daan sa iyang pagkadismaya sa pagkwenta sa maong dugang pletihan sanglit dili kini parehas kun itandi didto sa gitugot nga umento sa Manila.

Sa bag-ong umento didto sa kauluhan dugang P2 sa minimum nga pletihan ang gitugot ug dugang P0.25 matag mosunod nga kilometro samtang dinhi sa Central Visayas ug ubang parte sa Mindanao P1 lang ang gitugot apan walay dugang umento matag mosunod nga kilometro.

Si Pogado mirason nga ang presyo sa lana dinhi kun itandi didto sa kauluhan susama ra ug ang pagsaka sa presyo sa mga palaliton dili layo sa presyo didto maong wala kaayo makahimuot ang maong bag-ong usbaw.

Hinuon ang 20 porsiyentong discount sa mga tinun-an ihatag gihapon gawas lang sa mga legal holidays ug panahon sa bakasyon.