Limutan group misunod ni Torres

Human madakpi ang banggiitang tulisan nga si Rey Torres, laing pundok sa mga tulisan ang gipanid-an sa kapolisan human kini makaigo og mga payroll money sa pipila ka mga establisamento sa Mandaue ug Lapu-Lapu.

Ang grupo na usab karon ni Danny Limutan ang misunod sa grupo ni Torres pagpamiktima og mga establisamento sa Sugbo.

Sumala sa report gikan sa Intelligence and Investigation Section sa Mandaue City Police Office, ang mga miyembro sa grupo ni Limutan aduna nay mga rekord sa korte nga mga kasong robbery with murder.

Usa ka tinubdan gikan sa intelligence section sa MCPO nga mihangyong dili magpaila nga ang grupo ni Torres ug Limutan usa lamang kaniadto apan nagkabangi hinungdan sa ilang pagkabulagbulag.

Matud sa tinubdan nga nagkakuyog na og panulis ang grupo ni Torres ug Limutan, apan human magkabingkil nagbanus-banos na kini og pagpanulis.

Ang tinubdan miingon nga gipaninguha na karon sa kadagkuan sa kapolisan nga mahisama si Limutan ni Torres nga madakpan ug mabalhug sa bilanggoan aron taralon sa hukmanan tungod sa salaod niining nahimo.