Gidul-itan og pusil sa ulo Lalaking gi-salvage palgan sa Mactan-Mandaue bridge

Batan-on gidul-itan og pusil sa ulo patay nang napalgan diha sa may tiilan sa 1st Mactan Bridge sa sitio Seaside Barangay Pajo dakbayan sa Lapu-Lapu adtong milabay'ng gabii. Ang biktima gituohang gi-salvage.

Ang biktima kansang pangalan wala pa mahibaw-i usa ka lalaki gibana-banang 20 anyos ang pangidaron may gitas-ong 5'4," ug may ariyos sa walang dunggan, tulo ka singsing diha sa wala ug tuong kamot ug nagsuot ug puti nga t-shirt nga may markang TM-Tess Marketing ug shorts nga korduroy.

Si Inspector Francisco Baguio ang hepe sa Lapu-Lapu Police Homicide Section mitug-an sa Banat News nga duha ka buto sa armas de fuego ang nadunggan sa gwardiya sa Transco Power Corporation dili layo diin makaplagi ang biktima.

Usa ka gwardiya nga si Jovencio Azote kinsa maoy nagbantay sa Transco Power maoy giingong nakadungog sa duha ka sunod nga buto sa armas de fuego apan laing tawo ang mipahibalong dunay nagbuy-od nga tawo diha sa may tulay.

Base sa pagsusi sa kapolisan dunay samad pinusilan ang biktima diha sa luyong bahin sa ulo niini ug usa usab diha sa walang palad nga milapos sa luyo.

Si Inspector Baguio mibutyag nga dako ang posibilidad nga gidul-itan ang biktima sa pagpusil sanglit dunay nakitang mga "tattooing" ug "powder burns" diha sa walang palad sa biktima.

Posibleng miisa sa iyang kamot ang biktima aron sa pagpanalipod sa kaugalingon apan gibirahan gihapon sa wala pa mailhing mamumuno nga gipangita pa karon sa kapolisan.

Walay nakitang kabhang ug basiyo sa bala diha sa crime scene.