Bucao midayeg kang Leyson

Gihangop ni Talisay City Councilor Alan Bucao ang gisugyot nga pagkandidato pagka-mayor ni Konsehal Gabriel Leyson sa Talisay City karong umaabot nga election.

Matud pa ni Bucao nga daghan na ang nagpuli-puli nga mayor sa Talisay gikan sa lungsod pa kini.

May puro taga Talisay gyud sama kaniadtong kang anhing Mayor Leoncio Abarquez, Dehlia Tiu ug Socrates Fernandez.

May gikan usab sa Cebu City nga mipuyo usab sa Talisay apan nahimong mayor sama kang kanhi Mayor Eduardo Gullas.

Busa si Bucao miingon nga dili man usab sagkaon kon si Leyson mangandoy nga mokandidato sa Talisay tungod kay usa usab kini ka lumad nga Talisaynon.

Midugang si Bucao nga daghan og kayutaan ug uban pang kabtangan ang mga Leyson sa Talisay.

Gani ang kasamtangang Talisay District Hospital, gitukod sa mga yuta sa Leyson ug Velez diha sa San Isidro, Talisay.

Si Leyson nagtukod na karon og balay diha sa barangay Lagtang aron pagtuman sa balaod nga kinahanglan ang makakandidato sa usa ka lugar, nagpuyo na diha, unom ka buwan sa wala pa ang election.

Maoy hinungdan nga alang kang Bucao dili lisod ang pagdawat kang Leyson diha sa Talisay tungod kay ilado na ang mga maong pamilya diha sa Talisay.