Natagak sa lubi patay

Natagak sa gikatkatan niining punoan sa lubi nga mokabat sa 12 ka tiil nga gihabogon ang usa ka lalaki kinsa nakabaton gayod og grabeng kadaut sa iyang kalawasan ug namatay.

Nahitabo kini didto sa barangay Bogo sa lungsod sa Argao sa habagatang bahin sa lalawigan sa Sugbo niadtong miaging hapon.

Giila ang biktima nga mao si Mario Collantes, 38, nga nagpuyo sa maong dapit.

Sa nasayran gikan sa mga silingan nga naghatod sa Vicente Sotto Memorial Medical Center sa dakbayan nga daghan na ang mga punoan sa lubi nga gikatkat sa biktima nga ang tuyo mao ang pagkuha sa mga lahing na nga bunga niini aron nga koprason.

Mibunok ang kusog nga ulan ug dihang mituan kini mibalik na usab sa pagsaka sa pagpadayon sa pagkuha sa mga lahing nga bunga sa lubi.

Gituohang nga dangog ang punoan sa lubi nga gisak-an sa biktima human sa pagbunok sa ulan ug natapigas ang tiil niini sa hakhak nga maoy hinungdan nga natagak.

Ang mga mananambal nga nag-atiman sa biktima ang mideklarar niini nga patay na gayod nahidangat ngadto kanila.