Yuta alang sa mga farmer

Mokabat sa 35, 000 ka ektaryang luna sa agricultural land ang giandam karon sa Department of Agriculture (DA) nga mahimong magamit sa mga mag-uuma alang sa pagpananom.

Mao kini ang nasayran gikan kang DA 7 Regional Director Eduardo Lecciones nga gikahinabi sa mga tigbalita niadtong miaging adlaw.

Matud pa niya nga gihimo ang maong pagpangandam sa ilang buhatan sa DA dinhi sa tibuok nasud aron sa paghatag og panginabuhian sa mokabat 3 milyones nga gidaghanon nga katawhan.

Gitataw ni Lecciones nga dinhi sa Central Visayas maoy nalakip usab sa maong programa sa ilang buhatan sa DA ang Sugbo.

Dugang pa niya nga ang pagtuman sa maong programa nga pag-andam sa agricultural land dinhi sa nasud ang gitumong nga mahingpit nga kapahimuslan hangtod sa tuig 2010.

Kini maoy mahimong katamnan sa mga utanon, mais, humay, tubo, mga lagutmon ug uban pa nga mga produkto nga gitanom sa mga mag-uuma.