Parak itinumba sa Cotabato

MANILA, Philippines - Isa na namang pulis ang patay sa pananambang ng armadong kalalakihang sakay ng motorsiklo sa Cotabato City nitong Linggo.

Sakay ng motorsiklo si Police Officer 1 Danilo Sulatre pauwi sa kanyang bahay sa Notre Dame Village nang paputukan siya ng mga suspek gamit ang .45 pistola.

Isinugod kaagad sa ospital si Sulatre ng mga opisyal ng barangay ngunit hindi na siya umabot pa ng buhay.

Si Sulatre ay security escort ni Judge Bansawan Ibrahim ng Regional Trial Court Branch 13 sa Cotabato City.

Sinabi ni Senior Superintendent Rolen Balquin, pinuno ng Cotabato City police, inaalam pa ng mga imbestigador ang pagkakakilanlan ng mga suspek at motibo ng mga ito sa pag-atake.

Samantala, noong kamakalawa ay isang retiradong pulis naman ang biniktima ng mga motorcycle-riding gunmen sa bayan ng Isulan sa Sultan Kudarat.

Patay kaagad ang 66-anyos na si retired Senior Superintendent Teofilo Kinazo sa loob ng kanyang Toyota Hilux pickup matapos siyang pagbabarilin ng mga suspek.

Hindi pa rin malaman ng mga awtoridad ang pagkakakilanlan at motibo ng mga suspek.