Doktor at kanyang asawa patay sa pananambang

MANILA, Philippines – Utas ang isang doktor at asawa nito matapos tambangan sa Bauang, La Union nitong Miyerkules ng gabi.

Nakilala ang mga biktima na sina Mario Valera, 50 at asawang si Viana, 48.

Pinagbabaril ang mag-asawa habang sakay ng kanilang Mitsubishi Montero na may plakang NOE 518 sa national highway sa Barangay Acao bandang 7:40 ng gabi.

Namatay ang mag-asawa habang ginagamot sa Ilocos Regional Training and Medical Center sa lungsod ng San Fernando.

Sakay ng motorsiklo ang mga suspek at mukhang mga gun-for-hire dahil sa paraan ng pamamaslang, ayon sa pulisya base sa salaysay ng mga testigo.

Inaalam pa ng mga imbestigador ang motibo sa likod ng pananambang.