Intel officer ng military patay sa Basilan

MANILA, Philippines – Utas ang isang intelligence operative ng military matapos tambangan ng bandidong grupong Abu Sayyaf sa Basilan.

Nakilala ang biktima na si Corporal Nurhassad Imlani, intelligence operative na miyembro ng 18th Infantry Battalion, ng 104th Army Brigade.

Sakay ng kanyang motorsiklo si Imlani sa Barangay Kurellem sa bayan ng Tipo-tipo nang pagbabarilin siya ng mga armadong kalalakihan na sakay din ng motor bandang 10:30 ng umaga nitong Miyerkules.

Ayon sa military ngayong Huwebes, positibo nilang kinilala ang mga umatake na sina Abu Parung at Abu Mudzrie na kilalang miyembro ng Abu Sayyaf sa ilalim ng pamumuno ni Puruji Indama alias Abu Dujana.