38 Sulu army members hiniling makapagpiyansa

MANILA, Philippines – Hiniling ng Public Attorney's Office (PAO) ngayong Martes sa korte na hayaang makapagpiyansa ang 38 inarestong tagasuporta ni Sulu Sultan Jamalul Kiram III.

Sinabi ng hepe ng PAO na si Persida Rueda-Acosta na inihayin ng kanilang mga abogado ang motion for bail para sa 38 miyembro ng royal army ng sultan sa Tawi-Tawi Regional Trial Court Branch 5.

Naaresto ang 38 tagasuporta ng sultan ng mga nagpapatrulyang tauhan ng Navy sa karagatan ng Tawi-tawi nitong nakaraang linggo.

Nahaharap ang mga suspek sa mga kasong inciting to war, illegal possession of firearms, at paglabag sa gun ban ng Commission on Elections.

Iginiit ni Acosta na ang tatlong kasong kinakaharap ng 38 miyembro ng royal army ay bailable.

Nauna nang sinabi ni Acosta na kung mapagbibigyan ang kanilang hiling ay aapela rin sila na babaan ang halaga ng piyansang ipapataw ng hukuman.