19-anyos na may 30 kaso ng pagnanakaw huli sa Cotabato

MANILA, Philippines – Isang 19-anyos na lalaki na sangkot sa mahigit 30 kaso ng pagnanakaw ang naaresto ng mga pulis sa North Cotabato nitong Huwebes ng gabi.

Nakorner ng mga awtoridad ang most wanted na si Jestoni Saban sa kanyang kuta makalipas ang tatlong-linggong pagmamanman.

Ayon kay Arniel Melocotones, deputy chief ng Kidapawan City police, na may nakapagsumbong sa kanila na namataan si Saban sa may Sinsuat Street nang naturang lungsod.

Agad nagpatakbo ng mga tauhan si Melocotones sa naturang lugar. Tinangka pa umanong pumalag ni Saban sa mga pulis ngunit wala rin siyang nagawa.

Bukod sa patung-patong na kaso ng pagnanakaw, nahaharap rin si Saban sa hiwalay na kasong kriminal dahil sa panununog ng isang bahay sa Kidapawan City na pinagnakawan ng kanyang grupo.