Kilos protesta kontra fish ban ikinasa ng Pamalakaya

MANILA, Philippines - Magkikilos protesta ang mga grupo ng mga mangingisda sa susunod na linggo kontra sa fish ban na ipinapatupad ng Bureau of Fisheries and Aquatic Resources (BFAR) sa buong karagatan ng Visayas.

Ikinasa ng Pamalakaya, kabilang ang mga chapter nito sa Eastern Visayas, Panay-Guimaras Island, Negros Island, Central Visayas at Masbate ang kilos protesta sa Miyerkules.

Kasama sa protesta ang mga grupong Fisheries Marine and Environmental Research Institute (FMERI) at ang Visayan Sea Fisherfolk Forum (VSFF).

Sinabi din ng tagapagsalita ng VSFF na si Victor Lapaz na mananagawan din sila kay Presidente Benigno Aquino III na pag-isipan ang fish ban dahil pinapatay nito ang kabuhayan ng mga mangingisda sa rehiyon.

"We urge President Benigno Simeon Aquino III to rethink this fish ban or brace himself with a highly predictable Visayan fisherfolk revolt against fish ban," ani Lapaz.

Sinimulang ipatupad ang fish ban kahapon, Nobyembre 15 at magtatapos sa Marso 2013.

Taliwas sa pahayag ng Pamalakaya, sinabi ng BFAR na makikinabang ang mga mangingisda sa fish ban dahil pagkatapos nito ay siguradong tataas ang produksyon ng mackerel at sardinas ng 20 porysento.