Drayber sa ‘sikad gitusak sa bala

CEBU, Philippines – Patay ang drayber sa traysikad human gitusak-tusak sa bala sa tulo ka lalaki kinsa ang usa nadakpan sa Mahayahay I, Suba, dakbayan sa Sugbo pasado alas 4 sa nakalabay nga kadlawon.

Ang biktima naila nga si Crisanto Baguio, 29, ulitawo, samtang ang suspek nga nasikop naila nga si Cristopher Ian Marapoc, 23, pareho’ng nagpuyo sa maong lugar.

Matud ni SPO2 Rommel Bancog, imbestigador sa homicide section sa Cebu City Police Office, nga gikan nipalit og sigarilyo ang biktima ug kalit lang gipusil sa mga armado’ng lalaki.

Sumala pa ni Bancog nga ang igsuon niingon nga dunay gikawatan sa ilang lugar ug ang biktima ang napasanginlan.

Igo sa liog, dughan ug buko-buko ang naangkon ni Baguio nga dali pa unta nga gidala sa Cebu City Medical Center apan nakabsan gyud sa iya’ng kinabuhi.

Sa gihimo nga follow-up operation sa San Nicolas Police Station, nasikop si Marapoc pasado alas 8 kagahapon sa buntag apan hugot nga nihimakak sa pasangil apan ang igsuon sa biktima niingon nga ang suspek gyud ang nipusil patay ni Baguio.

Nagpadayun ang imbestigasyon sa kapolisan aron pagsikop sa laing duha ka suspek. BANAT NEWS