Breath analyzer gamiton vs motorist

CEBU, Philippines – Ipatuman na unya sa Land Transportation Office (LTO)-7 ang Anti-Drunk and Drugged Driving Act diin mogamit na og alcohol breath analyzer test ngadto sa mga motorista nga gisuspetsahang nakainom samtang nagmaneho.

Karong adlawa, adunay panagtigom nga himuon sa LTO uban sa mga sakop sa Police Regional Office-7 ug mga sakop sa Highway Patrol Group-7 kalabot niini.

Si LTO chief operations officer Joel Maloloy-on  dunay seminars ug trainings nga himuon alang sa mga kuhaong deputized agents sa LTO aron i-implementar ang Republic Act 10586 sa Central Visayas.

Ang Republic Act 10586 kon Anti-Drunk and Drugged Driving Act adunay bug-at nga silot alang sa mga drayber sa masakpang hubog o sabog sa drugas samtang nagmaneho. Si Maloloy-on mipadayag nga pilian lang ang mga polis nga i-deputized sa LTO.Nasayran nga niadto pang Marso 12 unta gipatuman ang maong balaod.

Si LTO-7 regional director Arnel Tancinco miingon nga 63 ka breath analyzers ang ilang gikinahanglan sa Central Visayas. Apan si Maloloy-on mipadayag nga ang LTO Central Office aduna palang 10 ka breath analyzers.

Kini bahinon, unom sa Cebu, duha sa Bohol, ug duha sa Negros Oriental. BANAT NEWS