Mga ihas nga mananap di ipadakop

CEBU, Philippines - Ang Department of Environment and Natural Resources sa rehiyon 7 (DENR-7) higpit  nga  mipatuman sa balaod  nga  nagdili  sa pagpanakop o pagpatay og  mga hayop  nga ihas kon wildlife.

Giklaro  sa maong balaod     nga gawas  sa pagbuhi  labing gidili ang  pagpatay  ilabi  na  sa mga  ihas  nga  mananap  nga  tua  mabuhi   sa duol 10 ka  libo kapin ka ektaryang yuta sa Rajah Sikatuna National Park (RSNP) sa Bilar, Bohol.

Matud pa ni DENR-7 Regional Executive Director Isabelo Montejo nga ang mga wildlife species maoy nakahatag og mahinungdanong bahin sa pagpreserbar sa balance  nga sistema  sa palibot.

Tungod sa pagkailado na sa  maong  lugar  isip wildlife resources o tinubdan  sa nagkadaiyang  mga  mananap  sa kalasangan, ang RSNP nakatala og 195 faunal species, nga naglakip  sa 25 species nga kwaknit, 13 species nga non-flying mammals, 120 species nga langgam, 20 species nga baki, pito ka species nga wizards ug usab 10 species nga bitin diin mitaklap usab kini sa 9, 136 ka ektaryang yuta  nga  giklasipikar  isip  good secondary growth forests o  mga kakahoyang  segunda  sa kalasangan

Ang dakong bahin  sa RSNP karon naglangkob sa natural nga lasang nga gidominar sa nagkalainlaing species  nga maoy naghatag og potensyal sa edukasyon ug siyensya  sumala pa usab sa mga pagtuon.

Sa pagkakaron, may dul-ang 40 na ka anaran na kaayong mga Philippine macaques nga tag-as og ikog ang nanimuyo sulod sa RSNP nga maoy nakahatag og atraksyon sa lokal ug langyaw’ng mga turista  nga  mobisita  sa maong  lugar.

Gipadayag ni Montejo nga pinaagi sa pagproteher ug pagpreserbar sa  maong  dapit uban sa aktibong partisipasyon sa komunidad, ang wildlife species nga anaa sa maong  lugar  sa pagkakaron makahimo sa pagpadaghan sa populasyon niini sa ilang natural nga puloy-anan.

Ang RSNP usa  ka kanhi  bahin  sa Loboc Watershed Reforestation Project ug giproklamar isip national park pinaagi sa Presidential Proclamation No. 129 niadtong  Hulyo 10, 1987 pinaagi sa rekomendasyon sa Bureau of Forest  Development.( /WC) (BANAT NEWS)