4 gipangluba angol sa fraternity group?

CEBU, Philippines - Naangol ang upat ka tawo human kini panunggaba sa grupo sa mga batan-on nga  gidudahang sakop sa fraternity, didto sa dalan M.L. Quezon, barangay Pusok, dakbayan sa Lapulapu alas 12 pasado ang takna sa miaging gabii.

Ang mga biktima mao sila si Jemuel Igot, 18, Gaybert Dulse, 20, JayCris Dulse ug Edmar Olestres nga pulos hingkod, ug nagpuyo sa maong dapit.

Si PO2 Jude Quiroben sa homicide section sa kapolisan sa maong dakbayan nga nahinabi sa Banat News miasoy nga ang duha nga kauban sa mga biktima nga sila si Junrey Tunacao ug Marian Acosta nga taga Ibabao, Pusok sa maong dakbayan maoy dali nga mihatud sa mga biktima ngadto sa Lapulapu City Hospital.

Apan  gibalhin  dayon  kini  ngadto sa Vicente Sotto Memorial Medical Center sa dakbayan sa Sugbo.

Si SPO1 Manolito Abellanosa sa homicide section sa kapolisan sa maong dakbayan miasoy nga naglingkod-lingkod ang grupo sa mga biktima sa daplin sa karsada dihang kalit lang gidasmagan sa mga kriminal nga pulos nagdala og kutsilyo.

Dayon  gipanunggab sa maong grupo  ang mga  biktima ug dihang nakita nila nga  samdan na kini,  namiya  dayon  sila  sa maong  lugar.

Sa pagkakaron  padayon  pang  gipanid-an  sa kapolisan ang maong grupo nga  gituohan  nila  nga  sakop  sa  usa ka fraternity aron  mapasakaan og  kaso  kadtong  nakadunggab. (Romeo T. Limpangog/WC) (BANAT NEWS)